Calidade Docente do Sistema Universitario de Galicia (QSUG)

 

Calidade Docente do Sistema Universitario de Galicia (QSUG) é unha ferramenta desenvolvida pola Axencia para a Calidade do Sistema Universitario de Galicia (ACSUG) en colaboración coas Unidades de Calidade das Universidades do SUG para facilitar a profesores, estudantes e responsables académicos os procesos de avaliación e a Xestión dos SGIC dos centros e títulos difundindo de forma inmediata a mellora continua da súa oferta.

Os novos requisitos de calidade para os títulos oficiais deben ter en conta o balance entre unha maior autonomía universitaria no deseño de programas e unha maior responsabilidade para coa sociedade nas súas actuacións. As universidades deben asumir compromisos cos seus usuarios relativos á transparencia informativa e á presenza de métodos propios de garantía de calidade e rendición de contas á sociedade.

A universidade debe render contas sobre os seus resultados e debe regular e garantir os procesos de toma de decisións relacionados coa avaliación e mellora da súa oferta académica así como coa avaliación, promoción, formación e recoñecementos do seu profesorado.

Conseguir unha maior obxectividade e transparencia no proceso de avaliación e consecuentemente realizar unha valoración baseándose en criterios de igualdade, merito e capacidade, é un obxectivo de todas as axencias de avaliación da calidade universitaria.

A utilización de ítems cuantificables e, polo tanto, objetivables, facilita a avaliación e engade información e transparencia ao proceso, que achegan seguridade e confianza entre os avaliados e os usuarios dos servizos.

QSUG pretende, polo tanto, ser un punto de información aos axentes do EEES: profesores, estudantes, PAS, egresados e empregadores, así como unha vía de información pública e rendición de contas das Universidades do SUG á sociedade en xeral.